《賤偵MADAM摷公仔》- 10月11日兒童不宜

《凸務MADAM》瑪莉莎麥卡菲賤精上身

繼《熱爆MADAM》(The Heat)同《凸務MADAM》(Spy)之後,金像提名爆笑女星瑪莉莎麥卡菲(Melissa McCarthy)終於回歸Madam 出位本色,主演瘋狂喜劇《賤偵MADAM 摷公仔》。為咗偵破一單離奇謀殺案,喪爆Madam 闖入布公仔私竇,反轉黃賭毒三級樂園,帶大家見識下佢哋兒童不宜嘅世界,保證賤過《賤熊》(Ted)!

Screen Shot 2018-10-05 at 4.12.58 AM

係犯罪懸疑定黑色喜劇? 講友情亦講英雄

導演伯恩漢臣(Brian Henson)係《芝麻街》同《布公仔樂園》(The Muppet Show)嘅製作人占漢臣(Jim Henson)嘅兒子。伯恩漢臣可謂繼承其父衣缽,早已製作過唔少老少咸宜、以布公仔為主角嘅影視作品;但拍開正路嘢嘅伯恩漢臣導演,今次竟然夠膽將呢個天馬行空嘅想像拍出嚟,更顛覆公司旗下布公仔嘅正面形象,史無前例咁將《賤偵MADAM摷公仔》拍成一部兒童不宜,有性有暴力嘅瘋狂喜劇。

心水清嘅觀眾可能會覺得故事套路同大衛芬查(David Fincher)導演嘅經典犯罪片《七宗罪》(Seven)有幾分相似,冇錯,編劇的確受到呢部作品啟發。所以你話佢係一齣犯罪懸疑片,冇問題;你話佢係黑色幽默喜劇,亦得;你話佢係講一對查案拍檔失而復得嘅友情、甚至係墜落英雄嘅救贖故事,都絕對講得通。

Screen Shot 2018-10-05 at 4.15.40 AM

荒謬得嚟好寫實? 布公仔影射社會邊緣族

喺電影入面嘅世界,布公仔有個性、有工作、有興趣,連人類嘅衰嘢都學到足,基本上已經同人類冇乜分別。遺憾嘅係,佢哋俾人類視為二等公民,受盡歧視甚至暴力對待,總被冠以負面形象。諗深一層,咁嘅情況唔係正正影射緊現實社會咩?好似演員伊莉莎伯賓絲(Elizabeth Banks)咁講:「呢個劇本係想講被邊緣化嘅社群、種族歧視以致貶抑女性嘅問題。我哋唔單止想娛樂大家,仲想透過電影語言帶出訊息。」如果觀眾能夠有咁樣嘅視野,《賤偵MADAM 摷公仔》又何嘗唔係一部講社會多樣與包容嘅寫實電影呢?

Madam喪爆出偵 索料high爆好狠勁Screen Shot 2018-10-05 at 4.04.40 AM

故事大綱

80 年代兒童節目《歡樂傳真機》嘅布公仔演員連環被殺,於是賤精Madam(瑪莉莎麥卡菲 飾)唯有深入黃賭毒三級私竇調查。點知Madam索料順便索埋糖,high 爆都未有料爆。更離奇嘅係,查查下幾乎所有疑點都指向布公仔拍檔飛機。好在Madam 發現事有蹺蹊,又念在舊日情誼,竟然願意幫佢洗脫嫌疑。正所謂摷兇又有乜好怕喎,生命滿希望,前路由佢喪!

Screen Shot 2018-10-05 at 4.03.45 AM

上映日期:2018年10月11日

主演:瑪莉莎麥卡菲、伊莉莎伯班絲

導演:伯恩漢臣

級別:IIB

片長:91分鐘

語言:英語 (中文字幕)

片種:喜劇 │ 犯罪

Tagged under:

Copyright 2014 @ AvantVS.hk Avant Vision Supreme 電影音樂動漫資訊. All Rights Reserved.