抵死鬧劇搞出深層意義:《波士BB》影評

最近喺各大地鐵站已經陸續見到波士BB電影嘅宣傳海報,可能大家都會覺得好有趣,點解一個BB會著住西裝咁老積?之前ChiLam配音嘅《狗狗當家》講寵物喺人類背後嘅世界,今次輪到BB做你波士,係咪好好奇究竟呢個鬼馬招積B葫蘆裡賣咩藥?

bossbaby, fox, baby

小編其實上個禮拜已經率先觀看咗波士BB嘅優先場,原來呢個BB來頭好猛,一出場就搞到父母陀陀擰,餵食餵奶包尿布氹訓覺全部都當正父母係奉旨咁,如果侍奉貓貓嘅叫貓奴,咁樣BB就成個大波士咁身邊就有兩隻B奴喺身邊隨傳隨到。唔止咁,BB嘅出現仲影響到原本受到萬千寵愛在一身嘅哥哥妒忌,認為佢搶走咗父母本來對佢嘅愛,破壞佢原本認為美好嘅家庭。但係原來呢個BB唔單止係一個BB咁簡單,西裝骨骨嘅佢仲識講野,佢其實仲身負一個好重要嘅任務,就係要阻止BB身邊最大嘅敵人——同樣咁人見人愛嘅狗仔,搶晒BB嘅 “市場佔有率”!(其實係咪諷刺緊宜家生育率不斷下降?)

bossbaby, fox, baby

小編身為屋企入面嘅大仔,睇到電影入面阿哥對細佬受到父母無限嘅寵愛而呷醋,自己都不禁回想起自己曾經都試過因為同細佬 ‘爭寵’而扭計,到最後明白到家人之間嘅愛唔係一個有我冇你嘅零和遊戲,而係一個學懂分享同互相愛護嘅過程。故事裡面嘅波士BB睇落好似成個大人咁招積,甚至喺大人面前每一個令人無法抵抗嘅可愛表情,原來都係波士BB刻意嘅算計,但係目的仍然離不開童真可愛嘅一面,就係想獲得父母嘅愛錫。就好似海報上面嗰句 “撒嬌BB最好命”,波士BB的確深諳此道。

bossbaby, fox, baby

到最後,原來故事裡面嘅葡萄大哥就係電影裡面嘅旁白,隔離仲有一個已經長大成人,但係仍然著住西裝嘅細佬,到底成個故事係真定係純粹係童真嘅想像?對於已經長大咗嘅我地嚟講,已經唔重要,最重要嘅係珍惜同愛護身邊嘅屋企人。

Tagged under:

Copyright 2014 @ AvantVS.hk Avant Vision Supreme 電影音樂動漫資訊. All Rights Reserved.

Log In or Sign Up