Author archives:

法式追夢系列:《天使愛芭蕾》影評

暑假檔期一向是卡通片的熱門上畫時間,同一時間有五六部動畫電影輪流上映已經是見怪不怪。這個暑假除了有“老是常出現”的美國式荷李活動畫之外,今次難得有電影公司把握暑假檔期,帶給觀眾一套來自法國的舞蹈主題動畫,讓觀眾在熱辣辣的夏日,感受一下與別不同的法蘭西風情。 相信本電影最受觸目的莫非首次擔任配音員的港隊“美女飛魚”歐鎧淳,她近年來憑著在體育界的高人氣,踏足娛樂圈,這次她擔綱女主角 菲莉絲 的配音工作。故事發生在19世紀末法國一條小村莊,裡面的孤兒院有一位天生熱愛舞蹈的女孩叫菲莉絲,在誤打誤撞之下與好友Victor 一齊偷偷逃離孤兒院到達人人心裡面的夢想之都巴黎。夢想當然與現實有差距,嚮往已久的舞蹈學院並不是任何人都能進的殿堂級學府,一個身無分文的孤兒小女孩,要如何才能夠考入頂級的舞蹈學院,成為一位一流的舞蹈家,實現夢想呢? 故事的背景發生在19世紀的巴黎,就在艾菲爾鐵塔還在建造當中的時候,一場古典與現代的交織,也是一場夢想與實現的華麗交響樂!縱然在故事的演繹方面,流暢度和劇情的展開只有過度簡單的交代,一開始好像不用花甚麼力氣就能夠逃出孤兒院,之後又很輕易地找到深藏不露的舞蹈老師;至於動畫畫工方面始終與目前荷李活製作的水平仍有落差,也許是法國(尤其是法國男性)天性比較浪漫和多說話,故事裡面的男角色的表情動作和對白都是極度浮誇,尤其是配上廣東話之後顯得更加“煩膠”,但是對於看慣了荷李活千篇一律的動畫電影,這齣以芭蕾舞作為主題的法式動畫片,仍然帶給小編不少新鮮感。希望將來電影公司能夠引進更多來自世界不同地方的動畫電影。…

Read more

為睇小黃豆而入場:《壞蛋獎門人3》影評

每隔幾年,每當有minions 系列電影之時,全港就再次吹起迷你兵團狂熱,碌下Facebook 都全部俾啲黃豆仔洗晒版,小編入場的時候,見到全戲院都幾乎係一家大細買飛入去睇新一集《壞蛋獎門人》。 基本上入得場嘅小朋友同大朋友都係為咗睇黃豆仔,經過上次只有平平評價的迷你兵團單飛前傳,今次《壞蛋獎門人3》的原班人馬Gru和Lucy,以及他的三個可愛的女兒再次登上銀幕與觀眾見面。劇情係點樣打壞蛋我相信未睇過電影的觀眾或者會想自己去了解,上兩集Gru由收養三個女兒再到同Lucy結婚,已經改邪歸正的他還能夠搞出啲咩新意?今集電影就為佢揭開身世,原來犀利哥仲有一位孖生兄弟叫巴閉哥,個樣同犀利哥生得一模一樣但係就多咗一頭金髮,孖生阿哥力勸犀利哥重新成為壞蛋,犀利哥喺正義聯盟不受重用令佢萌生做回壞蛋老本行的念頭。兄弟同心協力之下,一齊對抗今集打扮老土到爆的過氣童星“鬍鬚柏”。 今集重回犀利哥的主線劇情,迷你兵團的角色反而變得可有可無,觀眾可能在地鐵站的電影廣告見到迷你兵團今次主打“監獄風雲”,但是其實囚犯打扮的迷你兵團跟Gru的主線並沒有太大關係,反而像兩條平行的故事線,迷你兵團在電影的一半部份孭重飛。全套電影變成了東拼西湊的感覺:Gru兄弟打大魔王;Lucy慢慢與女兒建立感情;迷你兵團做監獄大佬,三條線基本上都各不相干,不過相信願意入場的多數都是之前兩集《壞蛋獎門人》一直追落去的觀眾,續集越拍越冇期待是常識吧。   最後值得一提的就是今集的壞蛋“鬍鬚柏”主打荷李活舊歌,有Michael Jackson的 “I’m Bad”、有 Aha 的 “Take on me”,也有Madona “Into Groove”,相信不少小朋友包括小編其實對這些經典歌也沒什麼認識,也許劇組希望透過這位“過氣童星”壞蛋來順便致敬一下荷李活八九十年代的經典之作吧。…

Read more

全港首間Sennheiser專門店進駐半島酒店

全港首間Sennheiser專門店已於2017年6月13日進駐The Peninsula Arcade並正式隆重開幕,一眾音響發燒友可以親身到專門店感受Sennheiser獨有的音響體驗。   Sennheiser專門店是香港首間專門店,店內更採用了新的Sennheiser徽標和文字標識,除了增加品牌的辨識度和易讀性,其看上去更優雅、更現代、更自信。店舖設計由深灰色襯托著白色的主調,顏色的配搭與店內細膩的裝置延續品牌高尚型格的風格,為顧客帶來全新的時尚概念。置身新店之中,可見深灰色毛氈地板,為店內營造舒適和鬆弛的環境,顧客可以安坐店中享受Sennheiser所帶來的感官樂趣。 作為全港首間Sennheiser專門店,店內展示和銷售多種系列的產品,包括:現時最受歡迎的無線耳機: PXC 550 Wireless, MOMENTUM Wireless 和MOMENTUM In-Ear Wireless,經典指標性旗艦耳機如 IE 800 和HD 800,用於線上會議的便攜式無線會議系統 Team Connect Wireless,即將正式發售的Dior Homme x Sennheiser 特別版系列和新一代驚世之作HE1等,讓顧客盡享不同的音響體驗。此外,Sennheiser 將會於店內不定期地舉辦不同的活動,為客戶帶來與眾不同的音樂享受。 現時,Sennheiser 專門店提供即場無限試聽服務,客人無須提早預約,試聽服務亦不設時限,讓客人能享受到最極致的音質效果。2017年下半年,Sennheiser將有不同的新產品在專門店展示,讓顧客率先享受新的音質體驗。密切關注Sennheiser 的社交平台Facebook以獲取更多最新資訊。…

Read more
src="https://www.youtube.com/embed/pEe1etIulaY" frameborder="0" allowfullscreen>

媽!好亂呀!:《變形金剛:終極戰士》影評

呢個地球相信已經冇辦法再阻止到Michael Bay繼續拍變形金剛,其實之前上幾部已經將Transformer系列拍到臭晒朵,劇情一次比一次無厘頭,然後導演瘋狂用飛機大砲大爆炸嚟吸引觀眾眼球。電影海報嘅宣傳攻勢已經開始喺各大地鐵站巴士站出現,比較驚喜嘅新演員有剛剛在美劇WestWorld 爆紅嘅Anthony Hopkins和新女主角Laura Haddock,而麥克華堡繼續擔任男主角。電影卡士十足,視覺效果當然絕不失禮,但是看過電影的小編只能以失望來形容本齣電影,或者當初就唔應該抱有任何期望。   故事劇情完全可以用混亂不堪來形容:一開始講述中世紀的亞瑟王率領群雄,在節節敗退的危急關頭下獲得變形金剛的幫助而取得勝利,然後鏡頭一轉回到柯柏文離開地球“尋根”,而其他博派被打壓的現代世界,男主角麥克華堡同小女主角Isabela Moner以及一位連名都唔知嘅二打六角色為拯救仍然留在地球的變形金剛而被軍隊連番追殺;逃出生天之際,卻又突然被一個搞笑的英式管家金剛帶到英國Sir Edmund Burton (Anthony Hopkins 飾) 的城堡;正當觀眾已經看到一頭霧水的時候,遠在宇宙的柯柏文在他的母星被他的造物主Quintessa 洗腦,要柯柏文協助毀滅地球。然後柯柏文以壞人身分返回地球,我相信我講到呢度,讀者們已經唔想再睇到我繼續寫劇情落去… 😅   毫無疑問,變形金剛系列出色的地方在於其目不暇給的視覺特效,本齣亦不例外,乒乒砰砰的大戰場面絕無欺場,或者小編已經看慣了宇宙飛船那些“招 招 招”的特技,本齣反而比較欣賞電影一開始的一段中古時代亞瑟王的戰爭場面,原本以為亞瑟王這條故事線會有更多的發揮,但是拍完一場大龍鳳之後只是為了交代一支神扙的下落。至於其他方面,劇情上已經爛得不能再爛,不同故事之間的聯繫非常薄弱,尤其是柯柏文本身由好人變成壞人,再變返做好人的一段簡直可以用兒戲來形容,然後改邪歸正的柯柏文率領一眾博派,三爬兩撥就把狂派和其他壞人打到落荒而逃,究竟是不是因為前面尋找線索的那些無聊情節佔用了太多時間,最後的“終極一戰”只用了不夠15分鐘變草草收場?   最後不得不提就是來自中國大陸的置入式廣告實在太過明顯,每次出現這些置入式廣告都會引來全場觀眾發笑,還有一些完全不好笑的笑話以及得啖笑的所謂劇情,究竟《變形金剛》系列除了特效還剩下甚麼?…

Read more

感人至深,真情流露:《天賦的禮物》影評

呢套戲齋睇個名真係有啲不明所以,叫《天賦的禮物》,可能英文名會有多啲頭緒 “Gifted”:呢個英文字一方面可以解咗上天嘅恩賜,而另一個解釋就係上帝賜給人類其中一樣最好嘅禮物:智慧。講戲名可能讀者都唔係好知我講緊乜,不過睇卡士我諗你應該會感興趣啲:冇錯,就係人人都識嘅美國隊長Chris Evans ? 美國隊長除咗做大英雄之外仲識得做啲咩呢?今次美國隊長終於放低件制服,修心養性做住家男湊女,今次仲要飾演一個照顧家姐死後留低姪女嘅單親爸爸。原來戲名嘅Gifted就係因為呢個姪女原來係一個gifted嘅資優生,仲要係一個七歲就識得解大學程度數學嘅天才。Chris Evans個阿媽,姐係細路女個外婆,一直都想將呢個細路女當做一個天才兒童咁栽培,想佢好似沈詩均咁即刻讀大學,但係作為養父嘅美國隊長就希望佢姪女能夠好似其他小朋友一樣有一個無憂無慮嘅愉快童年,唔想佢咁快就要變成一部失去童真嘅數學研究機器。雙方甚至為咗呢個細路女嘅撫養權而不惜對薄公堂… 故事最後當然係大團圓結局啦,不過我覺得呢套戲嘅重點唔係美國隊長今次有幾型幾chok,而係站喺呢個天才細路女嘅立場,到底點樣嘅教育對佢先係最好?究竟應該好好善用佢嘅天才,甚至不惜要佢放棄同好朋友一齊返學享受童年嘅日子,定係讓佢成為一個同普通人無異嘅一個平凡小朋友?呢個睇怕唔單止係戲裡面嘅問題,仲係普天之下父母之間都要面對嘅問題。有點可惜嘅係電影嘅結局某程度上有點太過理想化,一個過份完美嘅結局令呢個可憐天下父母心嘅難題得唔到一個更深入的探討。 相比起美國隊長一貫chok樣同溝女嘅戲路,本片最大嘅驚喜應該係作為小女主角嘅Mckenna Grace,雖然年紀只有十歲,但係論演技完全讓人感覺係一個非常有經驗的演員。充分演活一個天才兒童所面對的難處,無論係上堂串爆老師,同大人有趣招積嘅互動,同時演繹出佢同Chris Evans 之間深厚嘅父女情,場面相當感人,打動了不少觀眾。最令我印象深刻的一幕,以夕陽作為背景,鏡頭只有Chris Evans和Mckenna Grace在斜陽下投射出來的兩個黑影,細路女好活潑地喺養父嘅身上擒高擒低,另一邊Chris Evans同佢講述人生在世活著應有的意義,呢幕不禁令我反思,到底一個人應該要點樣先能夠活出最無悔的一生?…

Read more

矽谷朝聖遊(1):初抵三藩市

小編作為科技界嘅發燒友都已經至少有五六年,去矽谷朝聖一直以來都係小編嘅夢想,矽谷作為世界IT工業嘅搖籃,匯聚咗無數嘅精英同創意,短短二十年內誕生出無數嘅科技巨頭。小編喺上年到咗美國做半年交換生,終於有機會親自飛到三藩市,一探矽谷呢個科技界聖地嘅神秘面紗! 點樣去三藩市? 喺香港去三藩市,基本上只有一個方法,就係坐飛機。其實由香港坐直航去三藩市嘅選擇唔多,除咗國泰航空之外,仲有美國聯合航空 (冇錯,就係嗰間聯合關公航空)。直航三藩市嘅價錢的確係比較貴,小編岩岩喺skyscanner check 過,如果暑假期間出發的話,至少都要六千幾七千蚊。如果唔介意轉機的話,其實喺日本轉機或者喺韓國轉機都係一個唔錯嘅選擇。小編當時唔係直飛三藩市,而係先搭國泰航空去東京成田再轉飛新加坡航空去洛杉磯,全程大概15小時,來回程都係大概五千幾蚊,都平咗一截。當然如果想再平啲可以坐東方航空去上海轉機,不過國內航空公司就自己衡量啦。 由於小編喺先去LA嘅關係,所以我係喺LA坐夜巴去三藩市。洛杉磯同三藩市一南一北,基本上係加州兩個最大嘅樞紐城市,但係如果唔坐內陸機的話,就只可以坐八個鐘巴士去,再唔係就要自己揸車,畢竟喺美國基本上人人都有車,所以我坐巴士去三藩市嗰陣架巴士都唔係特別多人。 如果唔怕捱眼訓的話,夜晚十二點巴士喺洛杉磯開車,第二朝清早七點半就會去到三藩市。巴士收費會平過飛機,但係其實唔係真係平好多。我張巴士飛就係$20美金,飛機的話就要$40-50美金,不過飛機只需要個半鐘就飛到三藩市。 初到三藩市 岩岩到步三藩市嘅感覺就係呢個城市天氣相當清涼,洛杉磯相對會比較乾燥,三藩市就比較濕潤,但係完全唔會好似香港咁侷促。同埋三藩市本身係一個相對寧靜嘅城市,生活節奏比起紐約或者洛杉磯呢啲大都會緩慢好多,更加唔會話經常人多擠迫,所以所以難怪三藩市被稱為全美最宜居城市之一。 今日就首先簡單介紹下三藩市呢個城市,嚟緊繼續同各位讀者分享小編喺矽谷嘅見聞!…

Read more

抵死鬧劇搞出深層意義:《波士BB》影評

最近喺各大地鐵站已經陸續見到波士BB電影嘅宣傳海報,可能大家都會覺得好有趣,點解一個BB會著住西裝咁老積?之前ChiLam配音嘅《狗狗當家》講寵物喺人類背後嘅世界,今次輪到BB做你波士,係咪好好奇究竟呢個鬼馬招積B葫蘆裡賣咩藥? 小編其實上個禮拜已經率先觀看咗波士BB嘅優先場,原來呢個BB來頭好猛,一出場就搞到父母陀陀擰,餵食餵奶包尿布氹訓覺全部都當正父母係奉旨咁,如果侍奉貓貓嘅叫貓奴,咁樣BB就成個大波士咁身邊就有兩隻B奴喺身邊隨傳隨到。唔止咁,BB嘅出現仲影響到原本受到萬千寵愛在一身嘅哥哥妒忌,認為佢搶走咗父母本來對佢嘅愛,破壞佢原本認為美好嘅家庭。但係原來呢個BB唔單止係一個BB咁簡單,西裝骨骨嘅佢仲識講野,佢其實仲身負一個好重要嘅任務,就係要阻止BB身邊最大嘅敵人——同樣咁人見人愛嘅狗仔,搶晒BB嘅 “市場佔有率”!(其實係咪諷刺緊宜家生育率不斷下降?) 小編身為屋企入面嘅大仔,睇到電影入面阿哥對細佬受到父母無限嘅寵愛而呷醋,自己都不禁回想起自己曾經都試過因為同細佬 ‘爭寵’而扭計,到最後明白到家人之間嘅愛唔係一個有我冇你嘅零和遊戲,而係一個學懂分享同互相愛護嘅過程。故事裡面嘅波士BB睇落好似成個大人咁招積,甚至喺大人面前每一個令人無法抵抗嘅可愛表情,原來都係波士BB刻意嘅算計,但係目的仍然離不開童真可愛嘅一面,就係想獲得父母嘅愛錫。就好似海報上面嗰句 “撒嬌BB最好命”,波士BB的確深諳此道。 到最後,原來故事裡面嘅葡萄大哥就係電影裡面嘅旁白,隔離仲有一個已經長大成人,但係仍然著住西裝嘅細佬,到底成個故事係真定係純粹係童真嘅想像?對於已經長大咗嘅我地嚟講,已經唔重要,最重要嘅係珍惜同愛護身邊嘅屋企人。…

Read more

引力邊緣x異形:《外星生命》影評

大導演Ridley Scott的大製作《異形:聖約》在五月就會在大銀幕同大家見面,不過這齣異形能否重現1979年異形電影的熱潮仍是未知之數。無獨有偶,在異形新作上映前,本齣作品《外星生命》,小編會形容係《引力邊緣》同《異形》第一集嘅crossover,一隻怪物已經足以搞到成隻太空船機毀人亡! 行過中環站嘅電影海報上面只有三個太空人,但係其實真正故事裡面嘅太空人一共有六個,每位太空人都各有性格,也沒有明顯的主角配角之分,反而比較受到觸目嘅死侍男主角Ryan Reynolds喺好早階段就已經拎咗便當。故事好早階段就入局,火星嘅土壤樣本裡面發現有生命嘅細胞生物,好快呢隻生物由細胞長大到手掌嘅大小,並且開始襲擊人類。故事開宗明義道出咗怪物攻擊人類嘅原因:生存。一隻似八爪魚嘅火星生物,不但動作敏捷,仲唔怕真空、唔怕火燒、甚至擁有一定程度嘅智慧,人類喺無情嘅太空之中,面對近乎無敵嘅外星生物困獸鬥,顯得脆弱無力。 故事冇太多嘅文戲,劇情基本上同1979年嘅異形大致相同:人類用盡辦法想困住隻怪物,或者將佢拋出外太空,但係始終低估咗怪物嘅智慧,使得佢繼續有辦法襲擊人類。全齣戲都令觀眾處於極度驚恐嘅狀態,面對完全陌生嘅未知生物,人類毫無還擊之力。雖然劇情上有少少“做戲咁做”嘅感覺,例如怪物第一次攻擊人類,仍然係手掌咁細小,被攻擊嘅黑人科學家Hugh冇馬上關掉怪物嘅維生儀器,反而任由佢緊纏住自己的手;明明受過軍人紀律受訓嘅太空人Ryan Reynolds竟然會衰衝動打開隔離層救人,然後其他太空人陷入有如潑婦罵街嘅爭吵引致連番嘅錯誤決定令怪物成功逃出隔離層,最後落得太空人一個一個咁被殺嘅悲劇。總之六個太空人被一隻岩岩出世冇耐嘅火星怪搞到機毀人亡,實在有部分原因係咎由自取。或者觀眾需要一啲更加有智商嘅科幻恐怖片,照搬四十年前嘅異形公式已經冇辦法再滿足到觀眾嘅眼球。…

Read more
Copyright 2014 @ AvantVS.hk Avant Vision Supreme 電影音樂動漫資訊. All Rights Reserved.