《夜半女敲門》 Knock Knock

11月12日  小心女人

奇洛李維斯越軌闖入情色禁區　　破格演出．肉搏美少女﹗

《殺人慾室》得獎導演 挑戰情慾尺度 非常驚慄之作

父親節，本來最啱一家大細共享天倫樂；點知公事纏身，老婆帶兩個仔女去度假，自己就要獨留家中做好份工！捱到半夜三更悶悶地之際，竟然有兩個花樣女子拍門求助，想借宿一宵……呢個時候，你估，一個平時擔屎唔偷食嘅住家男會點做？荷里活影壇多面手艾利羅夫（Eli Roth）聯同荷里活型男奇洛李維斯（Keanu Reeves）一齊為你解開謎底！

荷里活鬼才艾利羅夫，唔止演技出色，編、導、監製、剪接、甚至音效配樂都難唔到佢。2005年自編自導及監製驚慄片《殺人慾室》（Hostel），大放異彩，贏得多項國際影壇大獎。之後艾利羅夫拍住大導演昆頓塔倫天奴（Quentin Tarantino）及羅拔洛迪格斯（Robert Rodriguez），玩票式客串執導《希魔撞正殺人狂》(Inglourious Basterds)、《索女‧喪屍‧機關槍》（Planet Terror）及《玩命‧飛車‧殺人狂》（Death Proof）等Cult片之後，今次再度回歸驚慄世界，自編自導及監製《夜半女敲門》（Knock Knock）；話畀男觀眾知，夜半敲門要小心！亦溫馨提示女觀眾，無論老公幾咁正人君子，都有可能出軌，玩死自己同埋屋企人！

故事取材自1977年老牌導演Peter Traynor經典驚慄名作《Death Game》。兩位南美裔索女羅倫莎伊素（Lorenza Izzo）及安娜迪艾瑪絲（Ana de Armas），在片中不但瞓身演出色誘「奇哥」嘅超尺度床戲，更會不斷變態虐待呢位超級型男；破格演出定必令奇洛李維斯嘅影迷耳目一新！難怪辛丹斯電影節影評（Sundance Film Review）都大讚演員出色，仲透露時下嘅科技及網絡生活，令《夜半女敲門》嘅驚嚇感更勝舊作！ 

 平生不作虧心事　夜半索女敲門  好狠……驚﹗

建築師依雲（奇洛李維斯 飾）事業得意、家庭美滿，過住令唔少人艷羨嘅生活。一個風大雨大嘅晚上，一次夜半敲門，兩個自稱蕩失路嘅女仔，令呢個行得正企得正嘅好男人跌落死亡陷阱！半夜三更，碰巧妻子同仔女離家度假，獨守空房嘅依雲敵不過美色當前，實行英雄救美，更得到兩個靚女以身相許報答！不過，估唔到一夜風流之後，就係惡夢嘅開始！堂堂男子漢畀兩女玩到甩皮甩骨，更被人將醜事即時上傳……隨時死咗都冇人可憐！