《海底奇兵 2》 FINDING DORY

迪士尼．彼思《海底奇兵》越玩越大 ! 新舊奇兵跟住失魂去尋親

超班配音陣容 ─ 劉青雲 x 毛舜筠 x 坤哥 x小儀 x King Sir！

歌神張學友驚喜客串! 絕對期待！

《海底奇兵 2》FINDING DORY

迪士尼．彼思最受歡迎的經典之一《海底奇兵》返嚟啦！今次仲係由彼思動畫史上全球呃LIKE指數最高的失魂魚多莉擔正做主角！當然馬倫和Mo仔兩父子都會再度登場，陪同老友多莉一齊展開尋親大冒險，追尋失魂魚的神秘過去，揭開身世之謎！

《海底奇兵 2》由首集導演安德魯史達頓 (Andrew Stanton) 再度執導，這位金像級導演先後憑《海底奇兵》(Finding Nemo) 和《太空奇兵．威E》(Wall．E) 兩度榮獲奧斯卡最佳動畫大獎，招牌新作絕對令影迷期待！

今集全新歷險場地將會移師至加州海岸，仲有更多搞鬼好玩的新角色加盟，包括脾氣古怪終日想走佬的八爪魚、以為自己聲納系統失靈的神經質白鯨、同多莉一見如故好啱傾的大近視鯨鯊等。一眾新舊海底奇兵肯定會為觀眾帶來更多歡樂笑聲！

香港配音版亦請到首集的毛舜筠和劉青雲再度擔任多莉和馬倫的「代言人」，而新角色就有吳業坤和阮小儀開聲助陣，分別聲演白鯨比利和鯨鯊沙沙妹，一眾搞笑高手合力炮製更多地道笑料，讓本地觀眾睇得更加開心投入！

對比2003年首集，今時今日的動畫特技超越了十萬八千里，今集以最新最頂尖技術打造的深海世界，肯定比首集更逼真、更繽紛、更多壯觀精彩大場面，讓觀眾完全置身其中，再度展開一次愈玩愈大驚喜無限的刺激深海大冒險！

【故事大綱】

上一次歷險歸來，失魂魚多莉(毛舜筠)本來跟住馬倫(劉青雲)和Mo仔兩父子安安樂樂過日子，但一次目睹魔鬼魚大遷徙行動，竟然令無乜記性的多莉突然閃現零碎回憶片段，意識到自己與父母失散多年，於是決心展開尋親大行動，仲拉埋馬倫和Mo仔落水，一齊向加州海岸進發，仲有鯨鯊沙沙妹(阮小儀)、白鯨比利(吳業坤)、七爪魚阿亨(King Sir)等一大班新朋友傍住歷險，仲有歌神張學友驚喜客串！最終多莉能否揭開身世之謎？定係轉個頭又再乜都唔記得晒？

【同場加映萌爆短片《BB肚餓鳥》】

同場加映萌爆短片《BB肚餓鳥》(Piper)，由一隻住在海邊的初生超萌BB鳥為主角，因為肚仔餓大住個膽離開雀巢去搵食。不過牠的目標美食卻是埋在海岸邊緣泥沙之下，BB鳥見到洶湧而至的大浪已經嚇到腳仔軟見頭暈⋯⋯好彩有個新朋友教路，令BB鳥鼓起勇氣再為搵食出發，填飽個肚仔！

《海底奇兵》威水史

• 榮獲2003年奧斯卡最佳動畫長片，同時榮獲最佳原創劇本、最佳配樂、最佳音響剪接提名。
• 榮獲金球獎最佳電影（喜劇或音樂劇）提名
• 2008年獲美國電影學院選為史上十大動畫電影
• 上映當年全年最賣座G級（適合所有年齡的觀眾）電影
• 全球最賣座動畫電影第5位
• 電影在Facebook獲得超過1,900萬個Like
• 多莉獲得超過2,500萬個Like，成為迪士尼或迪士尼．彼思電影中最多人Like的角色