憑著移動迷宮系列跑出的三位主角，Thomas, Newt 同 Oppa Minho，相信小編都唔需要多作介紹。今次嚟到移動迷宮嘅最後一集，一眾主角已經一早就逃出迷宮，向最大仇人WKCD 世災殺署終極報復！ 近日明珠台重播返上兩集移動迷宮，不過好明顯只有第一集先係同 “移動迷宮” 有關，第二集已經變調變咗喪屍片，至於第三集，我覺得似特務片。第三集講述主角們加入咗反抗WKCD 嘅軍團，但係OPPA Minho 喺上集就被WKCD 擄走。反抗軍需要潛入WKCD 嘅老巢 – 號稱人類最後的堡壘。 雖然故事內容已經完全跳出移動迷宮嘅範圍，不過世界觀擴大之後，故事反而引發咗觀眾對於WKCD 嘅觀感有所改變。WKCD 為咗研製出喪屍病毒解藥，而選擇不人道地對待所謂有免疫能力的年輕人。究竟為咗大多數人的利益而犧牲少數人是否正確？女主角Theresa 就係抱持犧牲小我成就大我的觀念，而Thomas 就選擇不自由毋寧死。究竟誰對誰錯？值得觀眾深思。 電影的視覺效果相當出眾，但是牆外叛軍忽然攻入城，最尾大焚城的一幕卻是顯得有點為做而做。不過人人揸支槍，見人就殺，對於啱啱發生槍擊慘案的美國人嚟講，係咪又有另一層意義？…

麥迪文最近曝光率唔少，只可惜周身刀冇張利，前年去完長城捉妖，2017年拍嘅兩套戲，《堅離地殺人事件》同呢套《縮水人間》無論評價同票房都非常一般。小編年頭去完外遊之後返嚟睇咗包括呢套在內嘅三套戲，小編睇完之後真係希望麥迪文經理人可以幫佢client 睇真啲個劇本先好接戲，否則好快麥迪文會變成票房毒藥嘅代名詞。   其實縮水人呢個題材喺好多電影都出現過，三年前Marvel 嘅Ant Man 利用出色嘅CG 向觀眾呈獻一個相當新鮮嘅縮小世界。至於呢套《縮水人生》，講述不久的未來，人類發明將自己縮細千份之一而不會影響身體機能的方法。一杯只夠一個人飲嘅水，宜家可以喂飽幾百個縮小人，藉此可以解決地球人口過剩，資源短缺嘅問題。更甚的是，由於縮小人需要嘅資源減少好多，一個在普通社會嘅中低產人士縮小之後可以變成百萬富翁，從此過上富足舒適嘅生活。   其實縮小人的題材可以藉此探討好多社會問題，但是電影對於每一個可以探索的題材都一一輕輕帶過，結果不單止捉到鹿脫唔到角，直程係到喉唔到肺。難聽講句，睇完都唔知自己睇緊乜。   故事一開始想講麥迪文兩夫婦生活入不敷支，決定縮小自己，用僅餘嘅儲蓄，讓自己過上更好嘅生活。結果麥迪文成功縮小，但係麥太喺手術前忽然 “縮沙”，結果兩夫妻 “大小永隔”。電影係咪想藉此嚟探討兩夫妻的相處之道呢？原來唔係，用五分鐘交代離婚收場就草草了事。   跟住電影發生某極權國家強迫異見人士縮水，利用縮水變成打壓異己嘅手段。電影係咪想繼續探討政權壓迫人民的政治倫理？原來又唔係，仲忽然彈出一個英文口音非常煩膠嘅 “第二女主角”。   電影除了講述麥迪文縮水後幫自己買咗棟 “迷你大宅”之外，其實舒適的生活並非必然，縮水人之間也有階級，也有縮水 “貧民窟”。但是電影同樣只是講啲唔講啲，每一個可拓展嘅空間電影都一一浪費。   最令人哭笑不得嘅係，電影中麥迪文雖然係縮咗水，但係由於大部分情節都發生在 “縮小人” 的社區裡面，結果所有嘅人同事物都同正常size 無異，觀眾完全睇唔到縮小咗同冇縮小到底有咩大分別。   結論，都係個句，麥迪文喺火星任務之後已經冇辦法再喺人氣同口碑上再下一城。麥迪文在戲路上始終冇辦法擺脫 “被拯救” 的角色，如果未來都見唔到有新突破，my apologies to Matt Damon, you are finished.…

挾著2018金球獎七項提名，並且奪得「最佳導演」及贏得「最佳原創音樂」兩項大獎，《忘形水》在香港似乎暫時沒有得到與國外相對應的人氣。小編在上星期入場觀賞優先場，觀眾的反應也不算太強烈。或者很大程度上香港觀眾的口味和美國荷李活觀眾的口味有不少差異，小編並沒有覺得這套電影有很多出色的地方。又或者小編以男性角度覺得本片講述的愛情太過「重口味」，睇開美女與野獸的港女們可能會覺得同水怪一齊都可以好浪漫。不過講明先，水怪真係水怪嚟，唔會錫多啖就變都敏俊教授。 故事內容講述在六十年代的美國，有一個天生啞的孤兒Elisa (Sally Hawkins 飾)在政府機密研究所做清潔女工。過著日日如是的生活，獨居的她最大的樂趣就是沖涼時自慰，還有找鄰居窮畫家Giles (Richard Jenkins 飾) 聊天。有天研究所忽然運來一隻來自南美嘅人型水怪，Elisa 誤打誤撞之下開始與水怪用手語來溝通。雖然在其他人眼中Elisa是個啞巴，但是在水怪的眼中，Elisa是一個完好無缺的人。漸漸地，有智慧的水怪慢慢學懂了用手語來溝通，Elisa 對水怪也越來越有感情。但是，政府把水怪捉來研究室，就是要利用水怪獨特的水陸互用呼吸系統和異於常人的強壯體格來進行太空實驗研究。而研究室的保安隊長Strickland (Michael Shannon 飾) 性格暴躁，經常毆打水怪來出氣。看在眼裡的Elisa，不忍水怪再受到不人道的對待，決定冒險救走水怪。在救出水怪的那一刻，Elisa已經徹底愛上水怪不能自拔…… 故事的背景放在六十年代的美國，縱使包含著一些美蘇冷戰的角力作為故事的襯托，但是故事的主軸其實是一套宣揚性小眾平權的電影。在一般人的眼裡，水怪是重口味的嘔心生物，但是在Elisa 的眼中，卻是一個真正能夠明白她、看到完美的一面的「人」。電影的後半段講述Elisa 救走水怪後，情不自禁地與水怪發生關係，滿足自己的靈與慾並不是甚麼羞恥的事，即使發生關係的對象並不為世人所接受。電影中的保安隊長Strickland，電影把他塑造成一個冷酷無情，火爆暴力的人物，其實象徵著傳統思想的保守勢力。現實生活上，對同性戀等性小眾人士最猛烈批評的，往往就是看上去道貌岸然的「宗教人士」。 人獸戀其實只是電影一個比較重口味的包裝，但是即使在2018年，還是有不少人反對同性婚姻，甚至連同性戀者鑑於世俗的目光而不願出櫃，令他們的性權益受到忽略。電影希望透過一首又一首的懷舊歌曲，以及啞巴Elisa 忽然唱起歌來，其實正好反映了性小眾人士他們不能開口的一個夢。…